குவைத் தமிழர் கூட்டமைப்புக் கூட்டத்தில் தோழர். தஞ்சை பெ.மணியரசன் அவர்கள் தொலைபேசி வழி உரை:

http://www.youtube.com/watch?v=gH7lXg_W9yM&feature=youtu.be

கொடுமனங்குளிர...

அறிவியலும் தொழில்நுட்பமும் கணிணியும் முன்னிற்கும் இக்காலத்தில் மக்கள் வளமோடும் மகிழ்ச்சியொடும் வாழ்வதாகத்தான் கருதிக்கொண்டுள்ளனர். ஆனால் நடப்பெதென்னவோ அழிவைநோக்கித்தானுள்ளது. 

வளரும் இளம் பருவத்தினரும் பள்ளி மாணவர்களும் கூட கத்தியும் துப்பாக்கியும் தூக்கித்திரிகின்றனர். பொய்யும் புரட்டுக்களும் கொள்ளையும் கொலையுமென கொடுமனங்கொண்டலைகின்றனர் மனிதர்கள்.

இதற்கெல்லாம் என்ன காரணம்? யார்க்காரணம்? என்ன செய்ய வேண்டும்?. அனைவரும் எளிமையாக செய்யக்கூடிய விடயத்தை, சென்னைப் பள்ளியில் கொலையுண்ட உமா ஆசிரியை வழக்கில் அவள் விகடனில் கருத்துத் தெரிவித்துள்ள சென்னை மனநல மருத்துவர் திரு.திருநாவுக்கரசு கூறியுள்ளார்.

”மொத்தப் பிரச்னைக்குமே காரணம்... நம்முடைய வளர்ப்பு முறையும், வாழ்க்கைச் சூழலும் தாறுமாறாக மாறிப்போய்க் கிடப்பதுதான். இன்றைய படிப்பு அறிவை வளர்ப்பதற்கு பதிலாக, பொருளாதார ஆதாயத்தை நோக்கியதாகவே மாறியிருக்கிறது. தாய்மொழிப் பாடங்கள் வழியே மாணவர்களுக்கு புகுத்தப்படும் நன்னெறிகள், நீதிபோதனைகள் எல்லாம் குறைந்துவிட்டன. நற்குணங்களை வளர்த்தெடுக்கும் அம்சங்கள் மொழி இலக்கியங்களில்தான் அதிகம் விரவிக் கிடக்கிறது. விரல்விட்டு எண்ணும் அளவிலான மாணவர்கள்கூட இதையெல்லாம் இன்றைக்குப் படிப்பதில்லை. அறிவியல், கணிதம் என்று இயந்திரத்தனமான பாடங்களையேதான் பிஞ்சுக் குழந்தையிலிருந்தே கற்றுக்கொள்கிறார்கள். நம்முடைய வற்புறுத்தலால்!.

ஊடகங்களில் அதீதமாகக் காட்டப்படும் வன்முறைக் காட்சிகள், குடும்பத்தில் பெற்றோரிடம் நடக்கும் தொடர் மோதல்கள், இன்னபிற அம்சங்கள் எல்லாமும் சேர்ந்து சிறுவயதிலேயே பெரும் குற்றங்களைச் செய்யும் அளவுக்கு மனதைத் தூண்டுகின்றன'' என்று பிரச்னையை வகைப்படுத்துகிறார் மருத்துவர்.”

தாய்மொழிக்கல்வி, செழுமையான இலக்கியங்கள், மலிவான ஊடகங்கள் இம்மூன்றும் முதன்மையான காரணிகள் என்கிறார். 

தாய்மொழிக்கல்வி தமிழர்கள் மறந்தவொன்றாகவுள்ளது. 

மிகச்சிறந்த உலகின் தொன்மையான நன்னெறிவளர்க்கும் இலக்கியம் தமிழில் கொட்டிக்கிடக்கின்றது, ஆனால் கவனிப்பார் யாருமில்லை.

மிகமலிந்த ஊடகங்கள் தமிழ்நாட்டில்தான் அதிகம் என்று கூறவேண்டும். சமூக அக்கறையின்றி தமிழர் பண்பாட்டை சிதைத்து வரலாற்றை மறைத்து உலக அழிவுப்போக்கிற்கு பெரிதும் துணை நிற்கும் இவ்வூடகங்கள்தாம் தமிழ்நாட்டில் செல்வாக்குப்பெற்று விளங்குகின்றன.

இவற்றில் நாம் மாற்றம் கொண்டு வராத வரை சமூக அவலங்கள் மாறப்போவதில்லை, அனைவரும் உணர்ந்து கொள்வோம், புத்துலகம் படைப்போம். 

தமிழர் மொழியும் கலையும் இலக்கியமும் ஒன்றே இதற்கான வழியென்பதை புரிந்துகொள்வோம்.

1431 பயோரியா பல்பொடி

நிகழ்த்துக் கலைஞர் திரு.நாகராசன் சொன்னத் தகவல்:

இன்று நிறுவனங்களுக்கு பல்வகைப் பெயர்கள் பல்வேறு காரணங்களுக்காக வைக்கப்படுகின்றது. குறிப்பாக எண்ணியல் அடிப்படையில் வைக்கப்படுகின்றது. ஆனால், பல ஆண்டுகளுக்கு முன்பாக தமிழர் ஒருவர் தம் நிறுவனத் தயாரிப்பிற்கு எண்ணையே பெயராக வைத்திருப்பது ஆச்சர்யமல்லவா?. ஆம் ”1431” பயோரியா பல்பொடி தமிழர்களிடையே புகழ்பெற்றவொன்று. வழக்கம்போல் நம்மவரை நாம் கவனிப்பதில்லை, மேலைநாட்டாரின் கோமாளிதனத்தைக்கூட வியந்து பேசுவோம்.

1431 என்பதற்கான காரணத்தை நாம் யாரும் சிந்தித்துக் கூட இருக்கமாட்டோம். சிந்தித்து விடை அறிந்திருந்தால் நமது வரலாறு பண்பாடு வாழ்வியல் என்பவற்றை அறிந்திருக்கக் கூடும்.

ஆம், 1330 குறளும், உமாபதி சிவாச்சாரியார் எழுதிய திருவருட்பயனில் 100 பாடல்களும் அதற்கான கடவுள் வாழ்த்து ஒன்றுமாகச் சேர்ந்து 1431 என்ற கூட்டுத் தொகையினை தமது தயாரிப்பிற்கு பெயராக வைத்துள்ளார் திரு.துரைசாமியார் அவர்கள்.

இதுவொரு வாய்வழிச் செய்தியாக இருந்தாலும், இன்று ஆங்கிலப் பெயர்களையும் சாதகம், வாசுது, எண்ணியல் பின்செல்வோருக்கு ஒரு சாட்டையடிதான்.

 எம்முன்னோர் திரு.துரைசாமியார் அவர்களின் எண்ணங்களையும் தொழில் முயற்சி புதுமைக் கண்ணோட்டம் என்னை வியப்பிலாழ்த்தியது.

வாழ்க துரைசாமியார் புகழ்!

பண்புடைமை

திருக்குறள் வகுப்பில் கேட்ட ஒரு கதை, பலரும் அறிந்தவொன்றுதான்.

ஆற்றில் தத்தளித்த ஒரு தேளை முனிவர் ஒருவர் கையால் எடுத்து கரையில் விடும் போது அத்தேள் அவரை கொட்டிவிட்டது. உடன் வந்த சீடர் அதை ஏன் காப்பாற்றினீர் கொட்டிவிட்டதல்லவா என்று கேட்க, கொட்டுவது அதன் இயல்பு, காப்பாற்றுவது என் இயல்பு என்று கூறி பண்புடைமைக்கு எடுத்துக்காட்டாக விளங்கியதாக ஆசிரியர் கூறினார்.

நீதி: துன்பம் நேரும் என்றாலும் பண்பில் சிறந்தோங்க வேண்டும்.

கைப்புள்ள சொன்னது: எல்லாம் சரிதான் தேளை கையால் எடுக்காமல் கம்பால் எடுத்தால் இந்தப் பிரச்சனை வராதுல்ல...!!!.

தமிழ்நாடன்

கடலூர் மாவட்டம், காட்டுமன்னை வட்டத்தில் குணவாசல் என்ற சிற்றூரில் ஆசிரியர் வெ.கண்ணுசாமி அவர்களுக்கும், கலையழகி அவர்களுக்கும் முதல் மகனாக 26-05-1973 அன்று பிறந்தேன்.

குணவாசலிலும், 12ஆம் நிலை வரை காட்டுமன்னை பர்வதராச குருகுலம் மேல்நிலைப்பள்ளியிலும் படித்துப்பின் மேல்மருவத்தூர் ஆதிபராசக்தி பொறியியல் கல்லூரியில் 1994ஆம் ஆண்டு பொறியியல் படிப்பை முடித்தேன்.

சென்னை, மும்பை, விசாகப்பட்டிணம் முதலிய இடங்களில் பணி புரிந்தபின் தற்போது வரை குவைத்தில் பணிபுரிந்து வருகிறேன்.

பள்ளிப்பருவம் தொட்டு பெரியாரியம் தமிழ்தேசியம் ஈழத்தேசியம் மார்சியம் இலக்கியம் அரசியல் துறைகளில் ஆர்வமுடன் ஈடுபட்டு வருகிறேன்.

பகுத்தறிவு சிற்றூடகப் பேரவை என்ற அமைப்பைத் தொடங்கியுள்ளதோடு, பொங்குதமிழ் மன்றம் என்ற அமைப்பிலும் குவைத் தமிழர் கூட்டமைப்பிலும் செயல்பட்டு வருகிறேன்.

தாயக முகவரி:

குணவாசல், ஆயங்குடி வழி, காட்டுமன்னார்குடி வட்டம், கடலூர் மாவட்டம் - 608306.

குவைத் முகவரி:

அஞ்சல் பெட்டி எண்: 9027, அகமதி- 61001, குவைத்.

கைபேசி: 00965-66852906

மின்னஞ்சல்: தமிழ்நாடன் (thamizhnadan@gmail.com)

முகநூல்:தமிழ்நாடன்

டுவிட்டர்: தமிழ்நாடன்

சுகைப்: thamizhnadan

”தானே” வருமா மாற்றம்?

தமிழகம் சவால்களை தாக்குதல்களை வெளியிலிருந்து மட்டுமல்ல உள்ளும் சந்தித்து வரும் அவலம் எப்பொழுதுமுண்டு. இதில் இணைந்துகொள்வதில் இயற்கைக்கு என்றும் அலாதி பிரியம் போலும். கடற்கோளைப் படித்து மறந்த நமக்கு 2004இல் கடல்தாயின் கோரமுகம் கண்டு ஆடித்தான் போனோம்.

தமிழகத்தின் கடலோர மாவட்டங்களில் ஆண்டுதோறும் புயலால் பாதிப்புகள் ஏற்படுவதும், அதற்கென சிறு உதவியினை விவசாயிகளுக்கும் பாதிக்கப்பட்டோருக்கும் வழங்கிவிட்டு, பெரும் தொகையினை அரசியல்வாதிகள் கொள்ளையடிப்பதும் வழக்கமான ஒன்றாகிவிட்டது.

இத்தாக்கம், நாகை, தஞ்சை, கடலூர், பாண்டி, காஞ்சிபுரம் போன்ற மாவட்டங்களில் அதிகமாயிருக்கும். இக்காலங்களில் மீனவர்கள், உழவர்கள், சிறு தொழில் முனைவோர், வியாபாரிகள் என பல்துறை தொழில் வணிகர்கள், தொழிலாளிகள் பெரும் பாதிப்புக்குள்ளாவர்.

இன்று வரை இப்பாதிப்புகளைக் குறைக்கவோ தடுக்கவோ எவ்விதமான நீண்டகால தொலைநோக்குத் திட்டங்கள் எதுவுமின்றி, அறிக்கை விட்டு ஆட்சி செய்துவருகின்றனர் தமிழகத்தை ஆள்வோர்.

புயலின் வேகத்தைக் குறைக்க கடலோரத்தில் மரங்கள் வளர்ப்பதும், வளர்ந்த மரங்களைக் காப்பதும் முதன்மையானதாகும். இதுகுறித்தான கவலை தமிழகத்தை ஆள்வோருக்கு என்றுமே இருக்கவில்லை. கடலூர் பகுதியில் காணப்படும் சதுப்புநிலக்காடுகளை காப்பதற்கோ, அழிவிலிருந்து மீட்கவோ கூட ஒரு முயற்சியுமில்லை.

இந்நிலையில், வழக்கமாக வரும் ஒரு புயலைத்தான் உழவர்கள் உள்ளிட்ட அப்பாவிகள் பலரும் எதிர்பார்த்து இருந்திருப்பர். ஆனால், அனைத்தையும் எதிர்நோக்கி மக்களைக் காக்க வேண்டிய அரசு இயந்திரம், வரும் புயலுக்கு பெயர் சூட்டுவிழா நடத்தி மகிழ்ந்திருந்தது. இரண்டு நாட்களுக்கு முன்னால் பெயர்சூட்டி மகிழ முடிந்தவர்களுக்கு இரண்டு மாதங்கள் நெருங்கிவிட்டப் பின்னும் தக்க உதவியினையோ, நிவாரணப் பணிகளையோச் செய்ய முடியாமல் போனதுதான் தமிழக மக்களின் கெட்ட வாய்ப்பாகும்.

மண்வெட்டியால் ஒரு கொத்து கொத்தினால் பீறிட்டெழுந்த தண்ணீர் இன்று 400 அடி தோண்டி எடுக்க வேண்டிய சூழ்நிலையால், கிராமங்களிலும் கூட குடிதண்ணீர் இன்றி மக்கள் அவதிப்படுகின்றனர். 90களில் இங்கிருந்துதான் சென்னைக்கு வண்டிகளில் தண்ணீர் கொண்டு செல்லப்பட்டது. ஆனால் இன்று இதே மக்கள் குடிதண்ணீருக்கு அவதிப்படும்போது, சென்னையிலிருக்கும் ஆட்சியாளர்கள் அமைதியாயிருப்பதுதான் வேதனை.

இன்று(11-02-2012) மாலை 0700 மணிக்கு சன் செய்திகளில் இயக்குனர் தங்கர்பச்சான் உருவாக்கிய தானே புயல் குறித்தான ஆவணப்படம்தான் இவ்வுண்மைகளை எடுத்துக்காட்டும் ஒரு சிறந்தப் பதிவாக இருக்கின்றது. வேரோடு சாய்ந்த மரங்களை வெட்டி எடுக்கவே ஆறு மாதங்களாவது தேவைப்படும் என்பதும், அதனை வாங்கிக்கொள்ளக்கூட யாருமே இல்லையென்பதும் வேதனையிலும் வேதனை. தங்கர்பச்சான் குறிப்பிடுவதுபோல இது உலகத்திற்கே ஏற்பட்ட பெருங்கேடு. இனியேனும் அரசு இயந்திரம் சுறுசுறுப்படைய வேண்டும். அரசுசாரா நிறுவனங்களும் தொண்டு அமைப்புக்களும் பிற அமைப்புகளும் ஒன்றிணைய வேண்டும். மீண்டும் இம்மக்கள் வாழ்வில் ஒளியேற்றவேண்டும்.

இதற்கு முன்மாதிரியாக, குவைத் பொங்குதமிழ் மன்றம் முதல் கட்டமாக உரூபாய் 50,000த்தினை குவைத் வாழ் தமிழர்களிடம் திரட்டி புயல்பாதித்தப் பகுதிகளில் நிவாரணப்பணிகளில் பங்கெடுக்கத் தொடங்கியுள்ளது, மேலும் தொடர்ந்து இயன்ற அளவில் செய்யவேண்டும் என்பதிலும் உறுதியாயுள்ளது.

சங்கரன் கோவில் இடைத்தேர்தலுக்கு அமைச்சர்களையும் அரசு இயந்திரங்களையும் முடிக்கிவிட்டுள்ள தமிழக அரசு, இலட்சக்கணக்கான மக்கள் துன்புறுவதைக் கண்டும் காணாமல் இருப்பது ஏனோ?.

”தானே” வருமா மாற்றம்? அல்லது மக்களால் மாற்றம் வருத்துவதுதான் முடிவாகுமா?.

வீரத்தாயவள் அற்புதம் அம்மாள்

உறுமும் புலியை
முறம்கொண்டு விரட்டும்
வீரத்தாயவள் அற்புதம் அம்மாள்..

இரு பத்து வருடங்கள்
இடையறாப் போராட்டம்
இழக்கமாட்டோம் இனியும்
எங்கள் பேரறிவாளனை...

பேராயக்கட்சியினரே
பேயாட்டமிடும் சோனியாவே
பல்லாக்குத்தூக்கும் சிதம்பரம் வகையறாவே...

ஓயமாட்டோம் இனி
ஒருவரையும் இழக்காமல்
காப்பதே எங்கள் பணி...

பொய்வழக்குகளைப்
புறந்தள்ளுவோம்
புதுப்படைகளை நாங்கள்
உருவாக்குவோம்...

வீரத்தாயவள் அற்புதம் அம்மாள்..